لاہور میں ماحول کو آلودہ کرنے والے غیر قانونی یونٹس کے خلاف بڑی کارروائی عمل میں آئی ہے، جہاں آپریشن کلین اپ کے تحت غیر قانونی ویسٹ برننگ، فیٹ ملٹنگ اور بون کرشنگ کے 473 یونٹس کی نشاندہی کے بعد انہیں مسمار کر دیا گیا ہے۔
مریم اورنگزیب نے محمود بوٹی کے علاقے میں غیر قانونی فیٹ ملٹنگ اور بون کرشنگ یونٹس کے خلاف جاری آپریشن کا جائزہ لیا۔ اس موقع پر ان کی نگرانی میں ایک غیر قانونی بون کرشنگ یونٹ کو موقع پر ہی مسمار کر دیا گیا۔
حکام کے مطابق شہر بھر میں ایسے یونٹس کی میپنگ کی گئی تھی، جس کے نتیجے میں 473 مقامات سامنے آئے۔ ان تمام غیر قانونی تنصیبات کو مرحلہ وار کارروائی کے ذریعے گرا دیا گیا تاکہ ان کے دوبارہ قیام کا راستہ روکا جا سکے۔
اس موقع پر مریم اورنگزیب کا کہنا تھا کہ عوامی صحت، صاف ماحول اور شہریوں کے بنیادی حقوق پر کوئی سمجھوتا نہیں کیا جائے گا۔ ان کے بقول قانون کی خلاف ورزی کرنے والے یونٹس کے ساتھ کسی قسم کی رعایت نہیں برتی جائے گی۔
غیر قانونی فیٹ ملٹنگ اور بون کرشنگ یونٹس کے خلاف یہ کارروائی شہریوں کو بہتر اور صاف ماحول فراہم کرنے کی کوششوں کا حصہ قرار دی جا رہی ہے۔ مریم اورنگزیب نے خود میدان میں موجود رہ کر آپریشن کی نگرانی کی۔
حکام کے مطابق ایسے غیر قانونی یونٹس کے خلاف کارروائی کا سلسلہ جاری رہے گا اور شہر کے مختلف علاقوں میں نگرانی برقرار رکھی جائے گی تاکہ آلودگی پھیلانے والی سرگرمیوں کو مؤثر طریقے سے روکا جا سکے۔